O teatro é para todos, e aínda así non chega a todos. Ás veces non chega ao adulto porque, de pequeno, non tivo ocasión de namorarse do teatro. Noutras ocasións non chega ao neno porque os adultos que o rodean non teñen ningún interese polo teatro. Non chega ao neno porque os adultos teñan outras prioridades ou porque hai obstáculos para acceder.
Debido ao seu carácter presencial e interactivo, o teatro está limitado na súa capacidade numérica para chegar ao público. Pero unha vez que o público está alí, respirando o mesmo aire que os artistas, ten a capacidade ilimitada de comunicar o esencial, o misterioso, o real e o posible.
Por iso os artistas debemos coidar a obra que creamos, para conseguir que cada encontro escénico sexa unha oportunidade para que o público teña máis curiosidade e interese e, se cadra, mesmo se namore do que o teatro lle ofrece.
Durante os próximos tres anos, pedimos a todos os membros de ASSITEJ que se unan á campaña "Leva un neno ao teatro hoxe" Esta campaña forma parte dun dos obxectivos fundamentais de ASSITEJ: garantir que todos os nenos e mozos teñan acceso ao teatro. Pero non podemos facelo sós. Somos conscientes da necesidade de traballar con aqueles que teñen o poder de decidir se os nenos e os mozos poden participar nun acto teatral. Facemos un chamamento aos gobernos, aos educadores, ás grandes e pequenas empresas e ás persoas en todas partes para que respondan a esta chamada. Pedimos aos membros e centros de ASSITEJ que os impliquen activamente e soliciten o seu apoio de xeito práctico e innovador.
Porque como dicimos "Leva hoxe un neno ao teatro", especialmente neste día tan especial, o 20 de marzo, agardamos que a nosa chamada á acción resoe todos os días do ano, para que cada neno e mozo, en todas partes, teña a oportunidade de namorarse do teatro.
YVETTE HARDIE
